Dili, 23 Setembro 2021, Ajénsia Nasional ba Avalíasaun no Akreditasaun Akadémika (ANAAA) hala’o avaliasaun no akreditasaun ba kursu/programa Enfarmagem Geral ho grau Lisenciatura iha Universidade de Dili (UNDIL) durante loron rua (22 & 23 setembro 2021), vizita avaliasaun loron rua ne’e envolve avaliador internasional Dr. Roxana Grace Belo husi Accrediting Agency of Charthered Colleges and Universities in the Philippines (AACCUP) – Filipina liu husi plataforma virtual ZOOM no prezensa avaliador nasional rua maka hanesan: dr. Raimundo dos Santos & dr. Matheus Pinheiro.
Objetivo husi avaliasaun no akreditasaun ida ne’e maka oinsa atu asegura elijibilidade & kualidade programa estudu enfarmagem geral ne’ebé oferese husi instituisaun ensinu superior sira liu husi avaliasaun no akreditasaun kursu tuir padraun no kriteriu husi ANAAA.
Durante avaliasaun ida ne’e avaliador sira sei konfirma fali proposta no relatóriu auto-avaliasaun ba kursu enfarmagem geral ne’ebé submete mai ANAAA.
Tuir ajenda, visita avaliasaun ida ne’e hetan partisipasaun maximu husi magnífiku reitor no estrutura, dosente, unidade IQA, no pesoal apoiu sira seluk no mos visita ba fasilidades inklui biblioteka ne’ebé maka iha departamento kursu enfarmagem geral hodi haktuir ba padraun & kriteria ANAAA nian.
Ikus liu, avaliasaun durante loron rua no atividade husi avalisaun ida ne’e finaliza ho relatóriu provisóriu no rekomendasaun balun husi ekipa panel ne’ebe pertinente tebes no rezultadu final husi avaliasaun ida ne’e sei públika husi ANAAA iha tempo tuir mai hodi hadia programa estudu refere.